ठरवणं आणि ठरणं
आपल्या आयुष्यात प्रत्येकजण काही ना काही ठरवत असतो.
कधी एखादं ध्येय गाठायचं, कधी एखादं नातं टिकवायचं,
कधी एखादी चांगली सवय लावून घ्यायची—
"आजपासून मी हे करणारच!" असं ठाम मनाशी पक्कं ठरवतो.
पण प्रश्न असा आहे की,
ठरवलं तसं नेहमी घडतं का?
बर्याचदा आपल्याला वाटतं तसं होत नाही.
कधी परिस्थिती बदलते, कधी अडथळे येतात,
कधी आपल्या हातात नसलेल्या गोष्टी
संपूर्ण चित्र बदलून टाकतात.
म्हणूनच “ठरल्याप्रमाणे झालं, तर ठरवायला अर्थ आहे;
नाहीतर ती केवळ ठरवाठरवी ठरते” असं वाटतं.
आपल्या ठरवण्याला पूर्ण होण्यासाठी
वेळ, संधी आणि परिस्थितीची साथही हवीच असते.
तरीही जीवनाची गंमत हीच—
आपण न ठरवता देखील अनेक गोष्टी
आपोआप घडत जातात.
कधी न ठरवलेली माणसं भेटतात,
न ठरवलेल्या वाटा समोर येतात,
न ठरवलेल्या संधी आपल्याला उचलून नेतात.
तेव्हा लक्षात येतं की,
आपल्या पलीकडे कुणीतरी मोठा ठरवणारा आहे—
जो आपल्या आयुष्याची दिशा ठरवतो.
म्हणूनच जीवनाकडे पाहताना दोन गोष्टी महत्त्वाच्या ठरतात—
१) आपण हवं ते नक्की ठरवणं, प्रयत्न करणं.
२) आणि न ठरलेलं जे घडेल त्याला समजूतदारपणे स्वीकारणं.
कारण शेवटी—
आपण ठरवतो तेवढंच नाही,
तर जे न ठरवता घडतं,
तेच कधी कधी आयुष्याला खरी दिशा देतं!
