*अंतरंग*
*प्रभातीचे रंग युट्युबवर*
१९९५-९० चा काळ खरंच खुप सुंदर होता. सुंदर सकाळची सुरुवात आकाशवाणीने व्हायची. सहा वाजता रेडिओ सुरू व्हायचा हिंदी राष्ट्रीय बातम्याने. त्यानंतर हवामान, भक्ती संगीत, प्रभातीचे रंग, आरोग्यम धनसंपदा ते सात वाजून दहा मिनिटाच्या पुणे केंद्रावरून प्रसारित होणाऱ्या मराठी बातम्या. परत मराठी चित्रपट संगीत. आठ ते सव्वा आठ वाजता हिंदी बातम्या,सव्वा आठला एखादा माहिती पुर्ण कार्यक्रम पुन्हा साडे वाजता दिल्ली केंद्रावरून प्रसारित होणाऱ्या मराठी बातम्या आणि आठ वाजून चाळीस मिनिटांनी आमच्या सर्वाच्या आवडीचा कार्यक्रम हिंदी चित्रपट संगीत.
सकाळचे सहा ते नऊ दरम्यान सर्व कामे आटोपत सर्व कुटुंब आकाशवाणीचे हे कार्यक्रम मन लावून ऐकत. अनेकजण या कार्यक्रमाच्या वेळा पाहून ऊठत, कामावर जात, काय करायचे हे ठरवण,घड्याळ लावत. *सकाळचे दोन तीन तास निर्भेळ आनंद, करमणूक, माहिती, चिंतन, भक्ती, शक्ती सर्व काही मिळत असे. खुप आनंदाचा काळ होता तो !*
आज काय चालले आहे ते सांगायची गरज नाही. आज किती घरात रेडिओ एवढा तीन तास ऐकला जातो हे शोधावे लागेल. किती जण सहा वाजता उठतात हा दुसरा शोध घ्यावा लागेल. किती जण भक्ती संगीत,चिंतन ऐकतात हेही पहावे लागेल.पण उठल्या उठल्या टिव्ही लावायला लागतो असे खुप जण आढळतील. टीव्हीवर हिंदी गाणी बातम्या ऐकायला पहायला येतात , मात्र रेडिओची ती मजा नाही. आता तर उठल्या उठल्या टच स्किन मोबाईल हातात घेतल्या शिवाय दिवस सुरू होत नाही. लहान मुलं मोबाईल मागतात, नसेल तर टीव्ही लावतात. सकाळचे चिंतन करायला कोणाला वेळ आहे. भक्ती संगीतामध्ये खुप चाँईस आले आहेत. आकाशवाणी वरील उठी उठी गोपाळा, कानडा राजा पंढरीचा ऐकण्यात जी मजा होती ती टीव्हीवर माऊली माऊली पाहताना कधीच येत नाही.
रेडिओ ऐकायला मुलांना आवडत नाही. मग काय करायचे असा विचार काही दिवसांपूर्वी माझ्या मनात आला . मी सहज You Tube वर मोटीव्हेशनल स्पिच नावाने सर्च केल्यावर मला माहिती आणि ज्ञानाचा खजिनाच आढळला . शिवव्याख्याते नितिन बानगुडे पाटील, शिव खेरा यांच्यापासून विश्वास नांगरे पाटील यांच्यापर्यंत अनेक दिग्गजांचे मोटिवेशनल थॉट्स , भाषणे मला आढळली .ब्लूटूथ स्पीकर लावून रोज सकाळी ही ऐकण्याचा सपाटा गेले काही दिवस मी लावला आहे .
घरात देवयानी सह सर्वजण माझ्या सोबत ही भाषणे ऐकतात. रोज अर्धा पाऊण तास चहा घेताना, निवांत बसल्यानंतर ऐकताना दिवसभराची ऊर्जा मिळत जाते. मुलांना मोबाईल देऊ नका असे सारेच म्हणतात मग काय द्या हे कोणी सांगत नाही. दुसरीकडे मोबाईलवर काय द्यायचे याची माहिती जर पालकांना असेल तर खूप चांगले पाहायला मिळते .
गेली महिनाभर रोज सकाळी आमच्या घरात मोटिवेशनल स्पीच भाषणे चहापाणी, व्यायामा वेळेस मी लावतो .पंधरा-वीस मिनिटे चांगले चिंतन होते. नितीन बानगुडे पाटील सरांच्या भाषणांमध्ये एक तरी गोष्ट असतेच. ही गोष्ट छोट्या मुलांना खूप आवडते त्यामुळे युट्युब वर या गोष्टी ऐकायला काही हरकत नाही.
*कुणाच्या हातात मोबाईल देऊन बघत बसण्याऐवजी मोबाईलचा स्पीकर लावून किंवा ब्लूटूथ स्पीकर लावून मोठ्या आवाजात फक्त भाषणे ऐकली तरी खूप आनंद मिळतो. हा आनंद मी गेली महीनाभर घेत आहे.*
कधी सकाळी कधी दुपारी कधी संध्याकाळी वेळ मिळेल तेव्हा युट्युब वरील मोटिवेशनल स्पीच सहकुटुंब ऐकण्यात खरच खूप मजा येत आहे. दिवसाची सुरुवात चांगली होते किंवा सायंकाळी ऐकल्यानंतर दिवसभराचा कंटाळा निघून जातो आणि नव्या दिवसाची नवी प्रेरणा मिळत जाते.
*काहीतरी वेगळं ऐकायला मिळालं म्हणून सांगण्याचा हा प्रयत्न*
धन्यवाद.
*सतीश वसंतराव मोरे*
सतिताभ
karawadikarad.blogspot.com
२१.०२.२०१९
